O Porriño, 16 de xullo de 2025.– O alcalde do Porriño, Alejandro Lorenzo, recibiu esta mañá na Casa Consistorial a Pablo Estévez, veciño da parroquia de Atios, tras ser recoñecido por sexta vez como Mellor Enólogo de Viños Xoves de España nos Premios Baco 2024, organizados pola Unión Española de Catadores (UEC).
Estévez suma así o seu sexto galardón nos últimos sete anos, converténdose nun dos nomes máis destacados da enoloxía estatal. Nesta edición presentou vinte viños, acadando tres premios Gran Ouro e o recoñecemento á mellor marca nova do ano en España, distinción que xa obtivo en cinco ocasións.
O propio Pablo Estévez sinalou que este recoñecemento “é froito do traballo, do esforzo e do compromiso”, e que supón para el “un orgullo persoal e tamén un recoñecemento a toda a dedicación que realizamos nas adegas co obxectivo de elaborar grandes viños”.
O alcalde, Alejandro Lorenzo, subliñou que “é un orgullo para o Porriño contar con veciños como Pablo, que levan o nome da nosa vila por todo o país, destacando non só polos seus logros, senón tamén pola súa humildade e profesionalidade”.
Unha vida entre vides
Nado en Alemaña, pero con raíces fondas no Ribeiro e Valdeorras, Pablo Estévez leva toda unha vida vencellada ao mundo do viño. A súa paixón naceu dos seus avós, viticultores, e aínda que nun principio seguiu outros camiños, acabou por formarse en Enxeñaría Agrícola e especializarse en Enoloxía. Desde hai máis de 25 anos colabora con adegas galegas moi diversas, sempre coa mirada posta na calidade e na adaptación ao mercado.
Durante o encontro co rexedor, Pablo compartiu a súa visión sobre a elaboración do viño, salientando que a calidade depende de múltiples factores, algúns dos cales non se poden controlar. “A anticipación, a adaptación ás circunstancias e a axilidade de resposta son clave para manter a excelencia ano tras ano”, explicou. Tamén destacou a importancia de garantir continuidade nas marcas, un obxectivo complexo debido ás variacións de cada colleita.
O Concello do Porriño felicita a Pablo Estévez e deséxalle que continúe colleitando éxitos no mundo do viño.
