Está dirixido a directivos ou persoas con responsabilidade de pemes
Celebrarase os días 8, 9 e 10 de setembro en horario de tarde e o prazo de inscrición xa está aberto
O Porriño, 8 de agosto de 2025.- Nun mundo cada vez máis interconectado e dixitalizado recoñécese a importancia de dotar aos directivos e as persoas con responsabilidade dentro das pequenas e mediansa empresas con ferramentas necesarias para afrontar os desafíos e aproveitar as oportunidades que ofrece a era dixital.
Baixo esta premisa, o Concello do Porriño difunde a posta en marcha dun programa de formación gratuíto en transformación dixital no centro social de Torneiros do Concello do Porriño. Será os días 8, 9 e 10 de setembro, de 16.30 a 19.30 horas e o prazo de inscrición xa está aberto a través da páxina web digalicia.es, escribindo ao enderezo de correo electrónico directivos@digalicia.es ou chamando ao número de teléfono 672 063 331, onde tamén poderán obter unha maior información.
Trátase dunha formación de 140 horas con charlas profesionais e contido relacionado con facturación electrónica, ciberseguridade, control horario dixital, marketing e posicionamento web, redes sociais e whatsapp bussiness. Os participantes contarán con asesoramento personalizado, sesións de mentorización individual ou grupos reducidos e orientación e asesoramento adaptado.
Dende o Concello do Porriño afiánzase así a colaboración co tecido empresarial local, apostando pola formación como ferramenta clave para avanzar na modernización e competitividade das pemes do municipio.
