A Praza Arquitecto Antonio Palacios acolle mañá pola noite un espectáculo a cargo do Mago Rafa e na tarde do domingo inchables de auga, tobogán e festa da espuma
No pavillón municipal dispútase o II Memorial Julio Gilsanz e Pontellas festexa Santo Paio
O Porriño, 8 de agosto de 2025.- No Concello do Porriño a actividade cultural e festiva non cesa no mes de agosto. Un espectáculo de maxia, inchables de auga e as festas patronais de Santo Paio conforman a a axenda cultural desta fin de semana na capital da Louriña.
A praza Arquitecto Antonio Palacios acollerá mañá sábado, a partir das 22.00 horas, un espectáculo para rir, sorprenderse e compartir. Será a cargo do Mago Rafa, que trae ao Porriño “Experiencias en familia”, unha proposta única e interactiva, pensada para que grandes e pequenos vivan momentos inesquecibles xuntos.
Xa o domingo, como todos os dos meses de xullo e agosto, instalaranse un tobogán xigante de 15 metros e inchables de auga para refrescar a tarde aos máis pequenos da casa rematando con festa da espuma. e para desfrutar de auga para pasar unha tarde. Será de 17.30 a 20.00 horas.
"Queremos que o Porriño sexa un lugar onde as familias poidan desfrutar xuntas do verán, da cultura e do lecer. Por iso, seguimos apostando por unha programación diversa, pensada para todos os públicos, e que enche de vida as nosas rúas e prazas. A veciñanza merece unha vila activa, dinámica e chea de ilusións, tamén en agosto”, sinala o alcalde Alejandro Lorenzo.
No ámbito deportivo, o pavillón municipal acolle dende hoxe o II Memorial Julio Gilsanz. Tralos resultados dos encontros desta tarde nos que se enfronta o Guardés contra o Gran Canaria e o Club Balonmán Porriño contra o Braga, mañá sábado disputarase o terceiro e cuarto posto, ás 18.00 horas, e a gran final ás 20.00 horas. A entrada é de balde.
De xeito paralelo, na parroquia de Pontellas celebran esta fin de semana as festas na honra a Santo Paio. Mañá sábado, a partir das 21.30 horas, haberá unha gran sardiñada, na que se servirá tamén porco ao espeto e polbo, amenizada coa música dos Reis da Troula, Os Festicultores e un dj. O domingo, ás 10.30 horas, será a saída do ramo dende Pousadela, acompañada pola Banda de Gaitas de Paramos de Tui; ás 12.30 horas misa solemne con procesión e pola noite actuación dos grupos Lume e Tania Veiras. Os actos festivos rematarán o luns 11, ao mediodía oficiarase a misa seguida da procesión acompañada da Banda de Música Municipal do Porriño e a verbena estará amenizada polas orquestras Finisterre e La Oca Band.
