A XXXVII Feira Apícola Rías Baixas arrancou esta mañá no Parque do Cristo cunha proposta educativa dirixida ao alumnado de 6º de Primaria: "Contos de Mel de Galicia". Trátase dunha actividade organizada polo Consello Regulador da IXP Mel de Galicia e a Agrupación Apícola de Galicia, coa colaboración da Concellería de Educación e da OMIX do Porriño, que busca achegar ao estudantado os valores e coñecementos da apicultura dun xeito lúdico e formativo.
A xornada, estruturada en dúas sesións, ofreceu ao alumnado a oportunidade de mergullarse no fascinante mundo das abellas: coñecer de preto o funcionamento das colmeas, descubrir os múltiples beneficios da apicultura e desfrutar dunha degustación comentada de mel galego con indicación xeográfica protexida.
Un total de 186 estudantes dos centros CEIP Cruz-Budiño, CEIP Antonio Palacios, CPR Hermanos Quiroga, CEIP Atios, CPR Santo Tomás, CEIP Fernández López e ACEESCA participaron nesta experiencia formativa, divididos en grupos para garantir unha participación activa e adaptada ao ritmo de cada sesión.
O alcalde do Porriño, Alejandro Lorenzo, destacou a importancia de apoiar este tipo de propostas: "Iniciativas como esta son fundamentais para que o noso alumnado coñeza e valore o traballo que hai detrás dun produto tan noso como o mel galego. É unha forma de educar en valores, respecto polo medio ambiente e tradicións que forman parte da nosa identidade".
Engadiu tamén un agradecemento á comunidade educativa: "Quero agradecer especialmente a implicación de toda a comunidade educativa do Porriño, sempre disposta a participar nas actividades que organizamos desde o Concello."
Pola súa parte, a concelleira de Educación, Carolina González, puxo en valor a colaboración entre institucións: "Desde o Concello traballamos para ofrecer unha educación complementaria e enriquecedora fóra das aulas. Grazas á colaboración co Consello Regulador da IXP Mel de Galicia e a Agrupación Apícola, hoxe conseguimos que os estudantes aprendan dunha forma lúdica e participativa".
A cita foi un éxito de participación e serviu como antesala perfecta para o resto de eventos que compoñen a programación da XXXVII Feira Apícola Rías Baixas, que continuará mañá sábado con novas actividades abertas ao público en xeral.
