O Club de Atletismo Porriño organiza, coa colaboración do Concello, a XII Milla Porriñesa Festas do Cristo 2024 que terá lugar o sábado 14 de setembro ás 19:00 nas rúas da vila. Esta proba é unha das carreiras máis populares, que invita á participación de corredores/as non federados/as.
A presentación da Milla Porriñesa tivo lugar esta mañá na Casa Consistorial coa presencia do alcalde, Alejandro Lorenzo, o concelleiro de Deportes, Abel Estévez, o presidente do Club, Miguel Novo Regueira, e o vogal, David Alonso Pregal.
Novo informa de que a inscripción é de balde e xa está aberta; pódese facer directamente na páxina do club atletismopor.com ata o 13 de setembro ás 23:59 h.
Como cada ano, hai probas para todos e todas. Ás 19:00 h comezarán os “pitufiños” de 2-4 anos, cunha distancia de 100 metros. Uns minutos máis tarde, co mesmo percorrido, será o turno dos “velocirraptores” de 5-7 anos. Os segurán os “esprinters” de 8-10 anos, cunha distancia de 400 metros. Os “correcamiños” de 11-14 anos correrán 800 metros. E xa a partir dos 15 anos en adiante, os corredores competirán na Milla Porriñesa, unha distancia de 1.609 metros, con saída e chegada na praza do Arquitecto Antonio Palacios. Esta categoría distinguirá aos veteranos/as A, 35-50 anos, e os veteranos/as B, maiores de 50 anos.
Alejandro Lorenzo, alcalde do Porriño, anima a toda a veciñanza a participar: “non hai excusa, xa que hai distancias adaptadas a tódalas idades. A Milla Porriñesa é unha das probas deportivas máis emblemáticas das nosas Festas do Cristo, na que pode participar calquera que teña máis de dous anos de idade”.
Premios da XII Milla Porriñesa
Nas categorías infantís, os tres primeiros e as tres primeiras corredores obterán un trofeo. O resto dos participantes recibirán unha medalla conmemorativa.
Os tres gañadores e gañadoras absolutos da Milla Porriñesa recibirán sendos trofeos e bolas de pan do Porriño. Os tres primeiros e primeiras de cada subcategoría de veteráns, tamén levarán trofeo.
O Club de Atletismo Porriño crea escola
Con máis de 200 corredores federados, o club porriñés está enfocado a “facer escola” entre a cativada, coa intención de que os nenos e nenas aprendan xa de pequenos boas prácticas deportivas, adestramentos e estiramentos que os axuden ao longo da súa vida, e vaian, tamén, despertando o amor polo atletismo.
Novo comenta que todas as persoas interesadas son benvidas porque teñen grupos de todas as idades e niveis. “Cada vez hai máis persoas de mediana idade que empezan a practicar o atletismo desde cero e nós estamos aquí para guialos, axudalos a coller forza para evitar lesións, e acompañalos nos seus obxectivos particulares”, explica. “A primeira semana é de proba, de balde, e así a persoa xa se pode facer unha idea e decidir se quere continuar”.
