A Concellería de Educación do Porriño informa de que desde o 1 de marzo permanece aberto o prazo para solicitar praza nos centros educativos do municipio de cara ao curso 2025/26. As familias teñen ata o 20 de marzo para presentar as súas solicitudes, tanto de maneira presencial nos centros como a través da plataforma electrónica habilitada pola Xunta de Galicia.
Este procedemento está destinado tanto ao alumnado que accede por primeira vez ao sistema educativo (especialmente aos nenos e nenas de 4º de Educación Infantil), como aos estudantes de Infantil, Primaria, ESO e Bacharelato que desexen cambiar de centro escolar, sempre que existan prazas vacantes.
O alcalde do Porriño, Manuel Alejandro Lorenzo Alonso, subliña que “o proceso de admisión é clave para garantir que cada alumno e alumna teña a praza que lle corresponde, e para que os centros poidan organizar correctamente o vindeiro curso”.
Os centros educativos do Porriño incluídos neste proceso son:
EEI de Mosende
CEIPP Xosé Fernández López (O Porriño)
CEIPP Antonio Palacios (Torneiros)
CEIP Ribeira (Torneiros)
CEIPP de Atios (Atios)
CEIP da Cruz (Budiño)
CPR Santo Tomás
CPR Quiroga
Reserva de praza xa realizada en xaneiro e febreiro
Cómpre lembrar que previamente, entre o 15 de xaneiro e o 4 de febreiro, estivo aberto o prazo de reserva de praza para o alumnado que remata etapa nun centro e pasa directamente a un centro adscrito. Esta reserva aplicouse, por exemplo, aos estudantes que remataron Infantil nunha EEI e pasan a un CEIP, ou aos que finalizan Primaria nun colexio e inician a ESO nun instituto adscrito.
Publicación de listaxes e formalización de matrícula
Unha vez pechado o prazo de solicitudes, o 25 de abril publicarase a listaxe provisional de admitidos e excluídos, sendo o 15 de maio a data na que se farán públicas as listaxes definitivas.
Posteriormente, os prazos de matrícula serán:
Do 20 ao 30 de xuño, para alumnado de Infantil e Primaria.
Do 23 de xuño ao 7 de xullo, no caso de estudantes de ESO e Bacharelato.
Novidades para o curso 2025/26
O vindeiro curso tamén incorporará melloras derivadas do acordo educativo incluído na Lei de medidas fiscais e administrativas da Xunta de Galicia para 2025. Entre estas novidades destaca a redución progresiva da ratio máxima de alumnado por aula, que xa se implantou este ano en 4º de Infantil e que no curso 2025/26 estenderase a 5º de Infantil.
Tramitación telemática e seguemento
As familias teñen á súa disposición no enderezo www.edu.xunta.gal/admisionalumnado, unha ferramenta dixital que permite cubrir e presentar a solicitude de praza, escoller os criterios de baremo que correspondan e consultar en todo momento o estado da tramitación. A solicitude pode presentarse de xeito telemático ou, se se prefire, presencialmente no centro educativo escollido como primeira opción.
A Concellería de Educación anima ás familias a realizar a súa solicitude antes do 20 de marzo e a consultar cos centros educativos ou co propio Concello calquera dúbida sobre este proceso.
